Turesten Organisashon Mundial di Salú tin malesanan síkiko riba number dos di e lista di malesanan mas frekuente, hopi biaha tòg ainda tin un tabú riba problema síkiko, kaminda esaki por sosodé tur hende. Meskos ku kualke otro malesa, melasanan síkiko no ta hasi distinshon di sekso, lugá di biba òf klase sosial.

Hopi hende no ta tribi papia tokante nan problemanan pa motibu di bèrgwensa òf e miedu pa keda kalifiká komo 'loko'. Tòg ta importante pa kompartí bo problemanan ku otro hende i no sigui kana bo so ku nan. Problema emoshonal i sikológiko por tin konsekuensia serio. Tratamentu por brinda solushon.

Bo tin kehonan síkiko i bo so no ta sali afó mas? Klínika Capriles ta ofresé tratamentu, guia i kuido na hende ku ta lucha ku problema sikiátriko i sikososial serio.