Komo organisashon nos ke tuma nos responsabilidat den evitá ku e Corona vírùs ta sigui plama. Seguridat i salú di no solamente nos kliente, habitante i bishitante, pero tambe di nos trahadónan ta na promé lugá pa nos. Esei ta nifiká ku nos tin ku tuma medidanan preventivo ku por ta fèrfelu i desagradabel i ku pa kolmo por kambia di un dia pa otro. Pero nos ta hasi tur loke ta den nos alkanse pa garantisá un ambiente sigur pa nos kliente i trahadónan.

Entrante 16 di mart no ta pèrmití bishitante subi tereno di Klínika Capriles. E medida akí ta konta tambe pa Yudaboyu, Brasami i Instituto Buena Bista ku tur ta ubiká riba tereno di Klinika Capriles. Restrikshon di bishita to konta pa Fundashon Sonrisa tambe.

Poliklínikanan di Klínika Capriles na Groot Kwartier i na Sòrsaka ta sera nan porta. Kaminda ta posibel ta posponé sita. Òf ta kambia e sita pa un konsulta telefóniko. Konsulta físiko ta tuma lugá solamente den kasonan di emergensia riba indikashon di dòkter di kas.
Pa resèpt, ta pidi tur kliente pa hasi esaki na tempu i pa manda nan petishon via WhatsApp, mail òf fax i nò bin na bali pa tuma resèpt.

Servisio na e grupo di kliente ambulatorio ta keda mas tantu posibel limitá na e nesesidat mínimo.

Ta tene klientenan interná i habitantenan mas tantu posibel paden riba e respektivo terenonan pa evitá ku un kliente por pega ku e vírùr riba kaya i bin bèk i pega sobrá kliente/habitante.

Nos ta sigui e desaroyonan andando di aserka i lo evaluá e medidanan siman pa siman i adaptá esakinan si ta nesesario. Nos lo sòru informá tur konserní debidamente.

Nos ta konta ku kolaborashon i komprenshon pa e medidanan drástiko akí, ku ta nesesario pa sostené un ambiente sigur pa tantu nos kliente komo nos trahadónan.